الأربعاء، 13 يوليو 2011

بس افتكر انى قولتلك بلاش

Sunday, May 22, 2011 at 1:02am

هيصه يا ناس ومحدش فاهم حاجه ولو حد فاهم حاجه يقولى والنبى وكل فاكر نفسه ياما هنا ياما هناك ياجدعان طب نقعد نتكلم طب نتناقش..... طب انت بتشتغل ايه يا حبيبى انا ثورجى.... ايوه يعنى ايه الوظيفه...... ثورجى اااااااااه ده انا فكرتك ثورجى !!؟؟ الناس فى الشوارع اللى جالها جالها فى مخها ودماغها وعقلها التلاته سوا بعد ما شافت الناس اللى معاها المليارات وهيا مكنش معاها تجيب غيارات كله بيوقلك ياللى بينا نعمل مظاهره طب عشان ايه؟ مش عارف بس يالا بينا بقى ...............حالنا دلوقتى ملوش غير تفسير واحد اه والله واعزرونى فى اللفظ ياللى هنا .......( واحده كانت متجوزه (اللى هيا مصر ) واطلقت من جوزها ( اللى هو الريس) ومصدقت اطلقت ماشيه تعمل اللى هيا عاوزاه طب يابنتى اتلمى شويه عيب كده لاااااااااااا طب وحده وحده بلاش كل ده ييجى مره واحده برده لااااااااااا........ هو حصل ايه ؟؟؟ ومحدش عاوز يسمع حد ليه ولينا بقينا معندناش دم و ايه قله الادب اللى بقيت فينا دى كل واحد بيعمل اللى هو عاوزاه تمشى فى الشارع تلاقى شاب واقف بطوله وعرضه زى البغل وماسك كروت شحن ويقولك تعالى يا باشا تعالى يا موزه كروت شحن الثوره .....ثوره ايه يابن العبيطه و كروت الشحن ايه ؟ تمشى تانى على اول الشارع تلاقى واحد قاعد وجايب باجور (كلمه اتلغت من زمان ) وبيعمل شاى وسحلب وينادى تعالوا ياشباب يابنات سحلب الثوره ........بالذمه ده كلام والنبى دى حاجه تتصدق ..هو ده اللى عملنا الثوره عشانه هو ده اللى اتفقنا عليه ومات بسببه الورود اللى فتحت جناين مصر......لا وكله كوووم بقى والحكومه كوووم تانى عماله تطبطب مفيش شخطه مفيش هوص ياواد هوص يابت نفسى اسمع حد بيزعق حد بيشخط ياناس عشان اخاف واتلم والم اللى حواليا !!!!!!!!! حرام بقى بجد عاوزين نهدى ونحترم نفسنا شويتين ونفكر.... بس فى حاجه واحده الولد اللى واقف بيشتم ده ويسب ويلعن فى الحكومه اللى فاتت هو انت يانجم يا امور انت عملت ايه صح فى حياتك ايه الايجابيات اللى عادت عليك وعلى اللى حواليك ونفعت نفسك بيها مكنتش بتغلط ولا هيا هيصه وخلاص اكيد غلطت مليار مره فى حياتك شتمت وعاكست وعملت اللى مينفعش يتكتب هنا ولا يتقال هناك الاخطــــــــــــــاء مابتتجزئش مفيش غلط صغنون وغلط كبير وانتى يا اموره ياللى واقفه فى كليتك بتشمتى العميد اللى اكبر من جدك مفيش احترام واخلاق هيا مش برده الاخت بتعمل حاجات غلط وانتى فاهمانى طبعا؟؟  ايه الفرق بينك وبين وزير فاسد هو بيغلط وانتى كمان الاخلاق مبتتجزئش !!!!!!!!! بقينا عاملين زى فيل صغير قابل فيل كبير قاله تاخد حلاوه قاله ليه هو انت فاكرنى شماعه راح واخد العجله وجرى ............اى كلام فى الحماده ومحدش فاهم حاجه مفيش تخطيط  لحياه مفيش عقل يفكر مفيش نرسى ونهدى ونتكلم .....انا مش ضد الوقفات الاحتجاجيه والمظاهرات طبعا لكن انا ضد التفاهه وعدم الاحساس بالمسؤليه يعنى من امتى احنا بنتكلم فى مسلم ومسيحى وانا من انصار الذين لا يعترفون بحاجه اسمها وحده وطنيه عشان اصلا اصلا احنا كلنا دمنا واحد واهالينا واحنا عايشن فى حضن بعض من ابد الابدين عشان كده لما حد بيقول قدامى وحده وطنيه بقوله لا اسمها وحده بيطريه لان اللى بيقولك كده مريض وعبيط !!!!!!!!! يارب الايام اللى جايه تكون احسن بس برده يارب ميجيش اليوم اللى نقول فيه افتكروا انه قولنا بلاش !!!!!!!!!!!! قولوا اميــــــــــن ورايا يا عيــــــــــال

هناك 3 تعليقات:

  1. عليا النعمه انت برنس .. انا مش عاوزه اقولك كميه السبهلله في المنطقه اللي عايشه فيها و غير اخلاق الناس في الشارع .. الناس فاكره الثوره و الاصلاح انه نعدم الريس و ناخد الفلوس و يبقي كدا نجحت .. صراحه انا مش حعتبر الثوره نجحت الا لما الاقيني ماشيه في الشارع و مش خايفه علي نفسي من اخلاق الرجاله او الناس اللي ماشيه في الشارع .. انا زهقت من السبهلله في الشارع .. دايما بسمع جمله : نعم ؟ ده احنا اللي عملنا الثوره احنا نعمل اللي عاوزينو .. يعني ايه يعني ؟ هو كان شارع ابوك .. بجد الناس خرمانه في مخها و انا بعتبر اننا في فتره اسهال سياسي لحد ما ربنا يفرجها بقي ...
    فعلا موضوع جميل و بتفق معاك فيه في كلمه بجد من غير مجامله

    ردحذف
  2. ميرسى يا نهال بجد الشوارع بقيت حاجه لا تطاق وحاسس ان الحياه زى ما هيا انا من النشطاء اللى حضروا للثوره دى ومن اكتر الناس اللى فرحت بالحلم اللى اتحقق لكن جه الوقت ان اننا نهدى شويه ونبطل كلام ورغى ع الفاضى ونحترم بعض اكتر واكتر لكن احساسى انه صعب اووى ده يتحقق فى مجتمع مش فى دماغه غير مراهقته وعايش على المعاكسات وده بس اللى فى محور اهتمامته

    ردحذف
  3. تم اضافة جزء من تدوينتك علي مدونة المحتوي العربي
    تابع نتائج البحث في جوجل
    http://sci-n-wisdom.blogspot.com/2014/04/balash-google-search-results.html#.U1PyhVdtWLg

    ردحذف